C/o Kancharapalem (2018) Sinhala Subtitle | සිංහල උපසිරැසි

තවත් තෙලුගු චිත්‍රපටයක් අරගෙනයි අද ඇවිල්ලා ඉන්නේ. 2018 සැප්තැම්බර් 07 තිරගත කිරීම ආරම්භ කළ මේ චිත්‍රපටය අයිති වෙන්නේ  Drama කාණ්ඩයට. තම පළමු චිත්‍රපටය අධ්‍යක්ෂණය ලෙසින් මේ චිත්‍රපටයට අධ්‍යක්ෂණයෙන් හා තිර පිටපත් රචනයෙන් දායකත්වය දක්වා තිබෙන්නේ Maha Venkatesh විසින්. නිෂ්පාදනයෙන් Praveena Paruchuri දායක වී තිබෙනවා. සංගීතය සපයා තිබෙන්නේ Sweekar Agasthi විසින්. මේ වන විට IMDb දර්ශකයේ 9.3 ක් වැනි ඉහළම අගයක් ලබාගෙන වැඩිම IMDb ශ්‍රේණිගත කිරීමක් ලද තෙලුගු චිත්‍රපට ලැයිස්තුවේ 27 වන ස්ථානයේ රැඳී සිටිනවා. 

සුපුරුදු ඇක්ෂන්, සුපුරුදු කතාවක්, ප්‍රසිද්ධ නළු නිළියෝ බලාපොරොත්තු වෙන අයට නම් මේක හරි යන්නේ නෑ. හොඳ චිත්‍රපට රසවින්දනයක් තියන අයට තමයි මේක හරි යන්නේ. මලයාලම් චිත්‍රපට බලලා හුරු කෙනෙක්ට නම් මේක කියාපු භාණ්ඩයක්. විශේෂම කාරණය කියන්නේ  Maha Venkatesh එහෙමත් නැත්නම් අධ්‍යක්ෂකවරයා ඇත්තටම තමන්ගේ ජීවිතයේදි පොඩි පොඩි රස්සාවල් කර කර ඉන්න කාලේ නැවතිලා හිටිය ගමක් තමයි Kancharapalem කියන්නේ. අධ්‍යක්ෂකවරයෙක් වුනාට පස්සේ මෙයාට හිතිලා තියෙනවා මේ ගමට ගිහින් චිත්‍රපටයක් කරන්න. තවත් විශේෂම කාරණයක් තමයි මේකේ චරිත සඳහා යොදා ගෙන තියෙන්නේ ඒ ගමේ එදිනෙදා වැඩ කටයුතු කරන සාමාන්‍ය මිනිස්සුන්වමයි. ඊට අමතරව සලීමා කියන ප්‍රධාන චරිතයක් සඳහා මේ චිත්‍රපටය නිෂ්පාදනයෙන් දායක වූ Praveena Paruchuri සහභාගීවී තිබෙනවා. ඒ වගේම මෑතක පැවති Zee Telugu CineAwards 2018 සම්මාණ උළෙලේ හොඳම චිත්‍රපටය (විචාරක) සම්මාණය හිමි වුනා. ඉදිරි සම්මාණ උළෙලවල් වලදිත් ඇගයීමට පාත්‍රවෙයි කියලත් හිතන්න පුලුවන්.

කතාව ගැන බැලුවොත් මේකෙදි කියවෙන්නේ විවිධ වයස් සීමාවල් වලදී ඇති වන ආදරය ගැන. වයස් සීමාවන් හතරක් මේකෙදි දැකගන්න ලැබෙනවා. පළවෙනි ආදර කතාව පාසල් කාලේ ප්‍රේමයක් ගැන. ගෑණු ළමයා එනකල් බලා ඉන්න විදිහ, එයාව ලබලා දෙන්න කියලා දෙවියන්ගෙන් ඉල්ලන විදිහ, යාලුවෝ උදව් කරන විදිහ වගේ රසවත් කතාවක් බලාගන්න පුලුවන්. දෙවෙනි කතාව අවුරුදු 22 - 23 වෙන තරුණයෙක්ගේ ආදර කතාවක්, ඔහු මුහුණදෙන ගැටළු, ජීවිතේ පිළිවෙලක් කරගන්න දරන උත්සහය වගේ දේවල් දැක ගන්න පුලුව්න. තුන්වෙනි කතාව අවුරුදු 33 ක තරුණයෙක් ගැන. නිතර මුණගැහෙන තරුණියකට හිතෙන් ආදරය කරන, ඒ ගැන කියන්න අවුරුද්දක් තිස්සේ බලා හිඳින තරුණයෙක්ගේ කතාවක්. අන්තිමට අවුරුදු 49 ක් වන තනිකඩයෙක් ගැන. තනිකඩව හිඳීම නිසා ගමේදි විඳින්න වෙන කරදර ගැන සහ තවත් ආදරයක් බලාගන්න පුලුවන්. ඔය කතා ටික ඔහොම ගලාගෙන ගිහිල්ලා අන්තිම විනාඩි දෙකේ කතාව ගළපන විදිහ නම් බොහොම රසවත්.

එහෙනම් හරවත් නිර්මාණයක් නරඹන්න කියලා ආරාධනා කරන ගමන් විස්තර හොයාගන්න උදව් කරපු තිමාල් ප්‍රනාන්දු සොයුරාටත් ස්තූතියි කියමින් අදට සමු ගන්නවා. තවත් උපසිරැසියකින් හමු වෙමු. ඔබට ජය!

සිංහල උපසිරැසි මෙතනින් බාගන්න

චිත්‍රපටය මෙතනින් බාගන්න

Aravindha Sametha Veera Raghava (2018) Sinhala Subtitle | සිංහල උපසිරැසි

2018 ඔක්තෝබර් 11 තිරගත කිරීම ආරම්භ කළ මෙ⁣ම චිත්‍රපටය අයිති වන්නේ Drama / Action කියන කාණ්ඩයට. තිර පිටපත් රචනය සහ අධ්‍යක්ෂණය කර තිබෙන්නේ Trivikram Srinivas විසින්. සංගීත අධ්‍යක්ෂණය සිදු කර තිබෙන්නේ S. Thaman විසින්. සංගීතය ගැන කතා කරද්දිී  Peniviti කියන සින්දුව ගැන බොහාම කතා බහ ඇති වුනා. ඒ ගීතයෙන් කියවෙන්නේ ස්වාමියා එනතුරු බලා හිඳින බිරිඳක් ගැන. බොහොම කතා බහ ඇතිවුන ගීතයක් නිසාම ඒකෙත් පරිවර්ථන අන්තර්ජාලයෙන් හොයාගෙන වඩාත් ගුණාත්මක ආකාරයෙන් උපසිරැසිය ඔබ වෙත අරන් එන්න හැකියාව ලැබුණ බවත් සතුටින් මතක් කරනවා. චිත්‍රපටයේ ප්‍රධාන චරිතයට රංගණයයෙන් දායකත්වය දක්වන්නේ කවුරුත් Young Tiger යන අන්වර්ථ නාමයෙන් හඳුන්වන Jr NTR. ප්‍රධාන නිළියට පණ පොවන්නේ සුරූපී නිළි Pooja Hegde.

තිරගත කිරීම ආරම්භ කරපු දවසෙම  ඉන්දියානු රුපියල් කෝටි 58 ක දළ ආදායමක් ලබාගනිමින් තෙලුගු ඉතිහාසයේ චිත්‍රපටයක් පළමු දවසෙන් ලද වැඩිම දළ ආදායම් අතරින් 4 වන තැනට පත්වෙමින් ජයග්‍රාහී ආරම්භයක් ලබන්නට මේ චිත්‍රපටයට හැකියාව ලැබුණා. US වලින් පළමු දවසේ ලද ආදායම මේ අවුරුද්දේ නිකුත් වූ Rangasthalam සහ Bharat Ane Nenu චිත්‍රපට අභිබවා යන්නටත් සමත්කම් දැක්වුවා. ඒ වගේම එදා මෙදාතුර තෙලුගු චිත්‍රපටයක් ලද වැඩිම 6 වන දළ ආදායම වාර්තා කරමින් කෝටි 158.6 ක දළ ආදායමක් ලබා ගන්නට මෙ⁣ම චිත්‍රපටයට හැකියාව ලැබුණා. ඒ Jr Ntrගේ සිනමා දිවියේ වැඩිම අාදායමක් ලද චිත්‍රපටය බවට පත්⁣වෙමින්. කතාව ගැනත් කෙටියෙන් මතක් කරන්නම්.

අවුරුදු 30 ක් තිස්සේ එකිනෙකා මරාගන්නා ගම් දෙකක්.

එකපැත්තකින් නල්ලගුඩි. අනෙක් පැත්තෙන් කොම්මද්දි.

නල්ලගුඩි වල නායකයා බසි රෙඩ්ඩි. කොම්මද්දි වල නායකයා නාරප්පා රෙඩ්ඩි.

නාරප්පා රෙඩ්ඩිගේ පුතා තමයි වීර රාඝවා රෙඩ්ඩි. 

එහෙමත් නැත්නම් අපේ කතා නායකයා.

පොඩ්ඩක්වත් ස්පොයිල් කරගන්න අකැමැති උදවිය මේ ටික කියවන්න එපා. අවුරුදු 12 ක් ලන්ඩන් වල ඉඳලා ආපහු ගමට එන රාඝවා රෙඩ්ඩිව එක්කන් එන්න ගිය ඔහුගේ පියා නාරප්පා රෙඩ්ඩිව, රාඝවා ලඟ ඉද්දිම බසි රෙඩ්ඩිගේ පුතා ඇතුලු මැර කණ්ඩායමක් විසින් ඝාතනය කරනවා. ඇත්තටම ඒ ඝාතනය තවත් එක් මිනී මැරුමක් විතරක් නෙවෙයි. ඝාතන රැල්ලක හැරවුම් ලක්ෂය පටන්ගන්නේ එතනින්. තාත්තගේ මළ සිරුරත් අරන් ගෙදරට යන රාඝවා රෙඩ්ඩි, අවසන් කටයුතු කළායින් පස්සේ ආච්චි අම්මා දෙන උපදෙස් නිසා ගම අතෑරලා හයිද්‍රාබාද් වලට යනවා. ඉතින් එහෙදි තමයි රාඝවාට අරවින්දාව මුණගැහෙන්නේ. ඒ කොහොමද? අරවින්දා මේ ගැටුමට සම්බන්ධ වෙන්නේ කොහොමද? තිස් අවුරුදු වෛරය ඉවර කරන්න රාඝවාට පුලුවන් වෙයිද? ඒ හැම දෙයක්ම චිත්‍රපටය නරඹලා රස විඳින්න කියලා ආරාධනා කරනවා. 

ප.ලි. : මේ චිත්‍රපටයටත් තවම ඉංග්‍රීසි උපසිරැසියක් නිකුත් වෙලා නෑ. හැබැයි ඉතින් කැමරා කොපියක තිබ්බ ඉංග්‍රීසි උපසිරැසියක් ආධාරයෙන් සහ බාගෙකටත් වඩා අසා ලිවීමක් වශයෙන් තමයි මේ උපසිරැසිය අරන් ආවේ. මේ උපසිරැසියට අසා ලියන්න අලුත් හවුල්කරුවෙක් එකතු වුනා. චානක ඉඳුනිල්. ඔන්න ඉතින් මේ මලයාටත් හොඳට තෙලුගු අසා ලියන්න පුලුවන් බව මේකෙන් තමයි දැන ගත්තේ. ඉල්ලීම් තියෙනවනම් මෙයාගෙනුත් ඉල්ලන්න ඈ. :P සමහර අය සමාජ ජාලා මාධ්‍ය වල අහලා තිබ්බා අයි මේකේ සබ් එක පරක්කු කියලා. ඇත්තටම අසා ලිවීමක් වුනාට අනිත් චිත්‍රපට තරම් ලේසි වුනේ නම් නෑ. ගොඩක් තැන් වල ගැමි භාෂාව භාවිතයට අරන් තියෙනවා. ඇත්තටම සාමාන්‍ය තෙලුගු වලට වැඩිය ඒවා තේරුම්ගන්න අමාරුයි. ඒ නිසා පොඩි පොඩි අඩුපාඩු තියෙන්න පුලුවන්. ඉංග්‍රීසි උපසිරැසියක් ආවම අනිවාර්යයෙන් අප්ඩේට් එකක් දාන්නම්. 

ඔබට ජය!

සිංහල උපසිරැසි මෙතනින් බාගන්න

චිත්‍රපටය මෙතනින් බාගන්න